Бугун Жанубий Корея кей-лигасида 36-тур ўйинлари бўлиб ўтди. “Сеонгнам” клуби “Кёнгнам”ни қабул қилди. Иккала жамоа ҳам кей-лигада жон сақлаб қолиш учун курашяпти ва ушбу ўйин жуда муҳим эди.

Тенг курашлар остида бошланган ўйиннинг 32-дақиқасида ўнг қанотдан оширилган тўпни Сервер Жепаров боши билан дарвозага тўғрилаб қўйди ва доимгидек сальтоси билан ўйингоҳга йиғилганларни хушнуд қилди. Биринчи бўлим шу ҳисобда якунланган бўлса-да мезбонлар 52-дақиқада жарима зарбасидан кейин ўз дарвозаларидан тўп олиб чиқишга мажбур бўлишди.

Умуман олганда, матбуот ва кенг жамоатчилик томонидан юқори маош олиши рўкач қилиниб, кўп танқид қилинаётган бўлса ҳам Сервер Жепаров сўнгги пайтларда юқори формада эканлигини кўрсатяпти. Кей-лиганинг бу мавсумида у ҳозирча 7та гол ва 3та голли узатмани амалга оширган. Жепаров мазкур учрашувнинг энг яхши футболчиси деб топилди.

Бугунги дурангдан кейин “Сеонгнам” 34 очко билан 11-ўринда қоладиган бўлди. “Кёнгнам” эса 36очко билан 10-ўринни банд этган. Энди сеонгнамликлар 23 ноябрь куни Сеулдаги "World cup stadium"да мезбон "Сеул" билан Корея футбол ассоциацияси кубоги финалида бош соврин масаласини ҳал қилишади.

Отабeк Йўлдошeв
Жанубий Корeя, Сeул