“Барселона”нинг узоқ йиллик мухлисаси Донья Мартина жамоанинг “Севилья”га қарши, Месси 3 та гол уриб, Ла-Лига тарихидаги энг яхши тўпурарга айланган ўйинини ҳам трибунага келиб кузатган эди. Орадан 3 кун ўтгач, бу хоним 100 ёшга тўлди. Жамоа раҳбарияти бу юбилярни ўз қароргоҳига таклиф қилди ва ўзига хос зиёфат уюштириб, Донья Мартина учун махсус тикилган “кўк-анорранглилар” либосини совға сифатида тақдим этди.

Мартина хоним Каталониянинг бир чеккасидаги Корнелья-де-Льобрегат шаҳарчасида истиқомат қилади ва ҳар сафар узоқдан келиб, жамоа ўйинларига тушади.

“Мени ўйинларга ҳар доим эрим Франциско олиб тушар эди, аммо охирги бир йилда у бетоб бўлиб қолгач, ёлғиз ўзим келишимга тўғри келмоқда. Мен ҳар сафар “Камп Ноу”дан чиқиб кетаётганимда, бу ерга яна қайтишни ният қиламан” – дейди Донья Мартина хоним El Mundo Deportivo журналистига берган интервьюсида.