Европа лигаси гуруҳ босқич ўйинларининг 5-турида “Интер” ўз майдонида “Днепр”ни қабул қилди ва словениялик дарвозабоннинг қаҳрамонлиги туфайли 2:1 ҳисобидаги ғалабага эришди.

Самир Ханданович ўйиннинг 20-дақиқасида Евгений Коноплянканинг 11 метрли нуқтадан йўллаган зарбасини қайтариб қолди. Бу билан у йил бошидан бери ўз дарвозаси томон тепилган пеналтиларнинг кетма-кет олтинчисини ҳам бартараф қилди.

“Интер” дарвозабони “А” сериянинг бу йилги мавсумида 1-турда “Торино”, 5-турда “Кальяри” ва 11-турда “Верона” билан ўтказилган ўйинларда пенальти зарбаларининг голга айланишига тўсқинлик қилганди.

Ушбу серия ўтган мавсумда "Сампдория"га қарши апрель ойида кечган ўйинда бошланганди. Орадан бир ҳафта ўтиб "Парма"га қарши ўйинда Самир Кассанонинг зарбасини бартараф этди.

30 ёшли посбон ўз фаолияти давомида умумий ҳисобда 26 марта 11 метрли жарима зарбасини даф қилган.