"Барселона" клуби кучли рақиб — "Валенсия" майдонида кечган мураккаб ўйинда ўта қийин ғалабани қўлга киритди. Ўйин шундай кечдики, "Барса" ҳам, "Валенсия" ҳам йирик ҳисобда ғалаба қозониши мумкин эди. Аммо ўйин тақдирини ўйиннинг энг сўнгги сонияларида киритилган гол ҳал қилди!

Шубҳасиз, бугунги ўйин қаҳрамонларидан бири каталонияликлар дарвозабони Клаудио Браво бўлди. У ўйин давомида валенсияликларнинг камида 3та яққол голга тортадиган зарбаларини бартараф этди. Айниқса, иккинчи бўлимда бирга-бир вазиятда Фигули, ҳамда Негредо томонидан яқин масофадан йўлланган зарбаларни қайтарилиши дарвозабоннинг маҳоратидан дарак берди.

Луис Суарес ўйин қаҳрамони бўлиши мумкин эди. У икки марта ўта қулай вазиятлардан гол ура олмаган бўлса, уругвайлик футболчининг "тоза" голини ҳакамлар офсайд деб баҳолаб, бекор қилишди.

Шунга қарамай, ўйиннинг охирги сонияларигача майдонда кескин кураш кечди. Қўшиб берилган 3 дақиқа ичида "Барса" кетма-кет 3 март бурчак тўпини тепди. Сўнгги бурчак тўпи тепилаётганида ўйин тугашига 15 сония қолганди. Аммо ўша "стандарт" гол билан тугади. Бурчак тўпидан кейин жарима майдончаси ташқарисида турган Алвес жарима майдончасининг ўнг томонида очилган Мессига узатма берди. Лео дарвозабон майдончасига тўпни чиройли тарзда етказди. Неймарнинг яқин масофадан бош билан берган зарбасини Диего Алвес қайтарди. Қайтган тўпни Бускетс кучли зарба билан дарвозага йўллади.

Ушбу ғалабадан кейин "Барселона" ўз очколарини 31тага етказди ва "Реал"ни (33 очко) таъқиб қилишда давом этади.

Испания чемпионати, 13-тур
Валенсия – Барселона 0:1 (0:0)
Гол: 0:1 – 90 Бускетс.
Валенсия – Алвес, Барраган, Мустафи, Отаменди, Гайя, Парехо (Аугусто, 84), Фуэго, Гомеш, Фегули, Негредо (Алькасер, 82), Родриго (де Пауль, 72).
Барселона – Браво, Алвес, Пике, Матье (Ракитич, 69), Альба, Бускетс, Маскерано, Хави (Рафинья, 80), Месси, Суарес (Педро, 80), Неймар.
Огоҳлантиришлар: Матьё (8), Пике (20), Барраган (20), Мустафи (27), Альба (29), Родриго (70), Месси (90+4).