"Манчестер Сити" клуби 2013/14 йилги мавсум учун молиявий ҳисоботини эълон қилди. Унга кўра, клуб ўз тарихида илк марта 300 миллион фунтдан кўпроқ даромад топган. Яна ҳам аниқроқ айтганда, клубнинг ўтган мавсумдаги даромади 347 миллион фунт (438 миллион евро)ни ташкил қилди.

Шунга қарамай, клуб 23 миллион фунт зарар кўрган. Зарарларнинг 16 миллион фунти молиявий фейр-плей қоидаларига амал қилинмагани боис УЕФА томонидан қўлланилган жаримага сарф қилинган.

"Рақобатбардош клубга айланишимиз учун клубга сезиларли инвестиция киритилиши талаб қилинарди. Биз бу даврдан ўтиб олдик. Тижорий жиҳатдан ўсишга эришганимиз келажакдаги операцияларимизга асос бўлади", - дейди клуб раиси Халдон ал-Муборак.

Клуб молийвий фейр-плей қоидаларини бузгани учун УЕФА май ойида "Сити"ни 60 миллион евро жаримага тортиб, ЕЧЛдаги заявка сонига чеклов қўйганди. 40 миллион евро шартли равишда ушлаб турилибди. Агар жамоа УЕФАнинг барча талабларини бажарадиган бўлса, бу маблағ "Сити"га қайтарилади. "Ман Сити" яқин 2 йил давомида трансфер учун харажатларни кескин камайтиришга розилик берди. Шунингдек, "шаҳарликлар" 2 йил давомида маошлар бўйича харажатларни ошира олмайдилар.