Эртага 11 декабрь куни Тошкент вақти билан 13:00да 2015 йилги Осиё чемпионлар лигасининг қуръа ташлаш маросими бўлади.
Аввал хабар қилганимиздек ушбу маросимда келаси йилги ОЧЛ мусобақасини гуруҳ босқичида бошлайдиган Қаршининг “Насаф” футбол клуби делегацияси ҳам иштирок этади.
Делегация таркибида “Насаф” ПФК бош менеджери Шамил Ярулин, клуб спорт директори Виталий Ни, маркетинг бўлими раҳбари Заҳро Каримова ҳамда клуб матбуот котиби Азизжон Нуровлар бор.
Делегация аъзолари бугун Тошкентдан Малайзиянинг Куала-Лумпур шаҳрига йўл олишади. ОФК қароргоҳида шунингдек келаси йилги ОЧЛ учрашувларини жойларда ташкил қилиш бўйича ўқув семинар ҳам ташкил этилади.
Демак, эртага “Насаф”, “Пахтакор” ва “Локомотив” клублари ОЧЛ-2015даги ўз гуруҳдошларини, яъни рақибларини билиб олишади ва учрашувларни қачон қаерда бошланиши ҳам маълум бўлади.
