"Барселона" клуби ўзининг кўпйиллик сардори Карлес Пуйоль учун хайрлашув баҳсини ташкил қилиб беради. Бу ҳақда клуб президенти Хосеп Бартомеу хабар тарқатди.

Ҳозирча учрашув ўтказилиш вақти, унда қайси жамоалар қандай таркиб билан иштирок этиши номаълум.

"Пуйоль бунга муносиб. У клуб тарихидаги буюк ўйинчилардан бири. Ўз вақтида биз бу масалани муҳокама қилгандик. Фақат вақт масаласи қолди", - дейди Бартомеу.

Пуйоль 1999 йилдан бошлаб "Барселона" шарафини ҳимоя қилиб, 2013/14 йилги мавсум якунланганидан кейин клубни тарк этиш нияти борлигини маълум қилди. Кейинчалик у спорт директори ёрдамчиси сифатида иш бошлади.

Пуйоль "Барселона" сафида олти марта Испания чемпионлиги ва икки марта мамлакат кубогини, 3 марта Чемпионлар лигаси ғолиблигини қўлга киритди. Бундан ташқари, футболчи ҳисобида 5та Испания суперкубоги, 2та УЕФА суперкубоги ҳам бор. Шунингдек, у 2 марта клублар ўртасидаги ЖЧда ғолиб чиққан. Карлес Испания терма жамоаси сафида бир мартадан Жаҳон ва Европа чемпионига айланган.