"Барселона" яримҳимоячиси Андрес Иньеста мавсумнинг биринчи ярми якунларига қандай муносабатда экани ҳақида гапириб ўтди. 16 турдан сўнг "кўк-анорранглилар" мусобақа жадвалида иккинчи ўринни эгаллаб, захирасида бир ўйинга эга пешқадам "Реал"дан 1 очкога ортда қолишмоқда.

"Мавсумнинг бир қисми якунига етган экан, энди бир неча кун оилам даврасида бўлишим мумкин. Бироқ Испания чемпионатини хаёлимдан ўчира олмайман, шундай бўлса-да, майдонга қайтишга ҳали шошилаётганим йўқ.

Биз ўзимиздан нима сабабдан бу қадар яхши ўйнай олаётганимизни сўрашимиз керак. Биз қилаётган ишимиздан роҳат оламиз. Бу бизга ғалаба қозонишда ҳам қўл келади. Лекин асосийси - яхши машғулот ўтказиш ва бу жараёндан ҳузур туя олишдир. Муваффақиятимизга ишонишимиз даркор. Амбиция ва энтузиазмни сақлаб қолиш муҳим", - дея Иньестадан иқтибос келтириб ўтди Football Espana.