Ўзбекистон терма жамоаси посбони Элдорбек Суюнов дарвоза дахлсизлигини сақлаш бўйича рекорд ўрнатди.

"Насаф" дарвозабони терма жамоа сафида ўзи иштирок этаётган ўйинларда сўнгги марта 27 май куни Уммонга қарши ўртоқлик ўйинининг (0:1) 20-дақиқасида гол ўтказиб юборганди. Шундан сўнг у Озарбойжон (0:0), Иордания (2:0), БАА (4:0), Фаластин (1:0) ўйинларида дарвозани "қуруқ" сақлай олди. Уммон билан ўйиннинг қолган 70 дақиқаси ва Ироққа қарши ўйинда ҳам ўз дарвозаси даҳлсизлигини сақлаб қолган Суюновнинг қуруқ серияси 520 дақиқага етди. Элдорбек терма жамоамиз сафида ўйнаган 9та ўйинининг 6тасида дарвоза дахлсизлигини сақлаб қолганлигини таъкидлаш лозим. 

Натижада Элдорбек 14 йилдан бери сақланиб келаётган Павел Бугалонинг 447 дақиқалик "қуруқ" сериясидан ўзиб кетди. Учинчи натижа эса Нестеровга тегишли — 387 дақиқа.