Жамоамиз янги мавсумга тайёргарликни 2 январь куни бошлайдиган бўлди. Клуб расмий сайти бунга қадар аввалига 20 декабр, кейинроқ эса 6 январ куни машғулотлар бошланиши ҳақида хабар берганди.
Хабарда қайд этилишича, раҳбарият ва мураббийлар штаби маслаҳатлашган ҳолда шу қарорга келишди. Футболчилар 2 январь куни тушда жамоа қароргоҳида жам бўлишади. Шундан сўнг клуб раҳбарияти мураббий ва футболчилар билан учрашиб, келаси мавсум режалари бўйича суҳбатлашиб олади. Шу куннинг ўзидаёқ биринчи машғулот ўтказилади.
4 январь куни "Оқ-тепа" биринчи назорат учрашувида майдонга тушади. Рақиб олий лига вакили - "Локомотив". "Темирйўлчилар"га қарши ўйин "Оқ-тепа" стадионида соат 13:00да бошланади.
