"Манчестер Юнайтед" Англия Премьер-лигасининг иккинчи даврасини, янги йилни дуранг билан бошлади. Улар "Сток Сити" майдонидан бор-йўғи дуранг билан қайтишди.
Учрашувдаги ҳар иккала гол бурчак тўпидан сўнг киритилди. Ўйиннинг 2-дақиқаси бурчакдан етказилган тўпга Крауч 14 метрлардан бош билан зарба берди. Мезбонлар сардори Райан Шоукросс яқин масофадан тўпни дарвозага буриб, ҳисобни очди. Агар Маме Диуф Жонни Эванснинг хатосидан сўнг бирга-бир вазиятда дарвозани ишғол қилганида, "қизил иблислар"га жуда ва жуда қийин бўларди.
"МЮ" эса голли вазият яратишга қийналди, аммо ўйиннинг 26-дақиқасида юзага келтирган илк хавфли вазиятидан сўнг ҳисобни тенглаштирди. Руни бурчак тўпини ўйинга киритди, Кэррик боши билан тўп йўналишини бироз ўзгартиргани аксарият ҳимоячиларни чалғитди, Фалькао дарвозабон майдончаси чизиғи устидан тўпни дарвозага йўллади.
Биринчи бўлимда тўп назорати Ван Гал шогирдлари томонида бўлди, аммо "Сток"нинг қарши ҳужумлари хавфлироқ бўлди. Иккинчи бўлимда эса ўйин мутлақо тенг бўлди. Ҳар иккала жамоа бир мартадан ўта хавфли вазият яратишди. Ван Персининг жарима майдончаси ичида "парашют" услубида йўллаган зарбаси дарвоза ёнидан ўтиб кетган бўлса, Краучнинг бош билан берган зарбаси дарвоза устунига тегиб қайтди.
Мазкур дурангга қарамай, "МЮ" жадвалнинг учинчи поғонасида қолади, аммо ўзидан кейинги ўринни эгаллаб турган "Саутгемптон" ва "Арсенал" унга жуда ҳам яқинлашиб олиш имкониятига эга.
АПЛ, 20-тур
Сток Сити – Манчестер Юнайтед 1:1 (онлайн трансляция)
Голлар: 1:0 – 2 Шоукросс, 1:1 – 26 Фалькао.
Сток Сити – Бегович, Питерс, Кэмерон, Шоукросс, Муньеса, Арнаутович (Ассаиди, 81), Нзонзи, Уэлан, Диуф, Уолтерс, Крауч.
Манчестер Юнайтед – Де Хеа, Эванс, Джонс, Смоллинг, Шоу (Янузай, 64), Янг (да Силва, 75), Кэррик, Мата, ван Перси, Фалькао (Эррера, 64), Руни.
