Англия терма жамоаси бош мураббийи Рой Хожсон АПЛ клубларида терма жамоа талабига жавоб берадиган ҳужумчилар етарли эканини қайд этиб ўтди. У, жумладан, Гарри Кейн ва Чарльз Остин номларини алоҳида тилга олиб, уларнинг анча ўсишга эришганини таъкидлади.

"Ҳозир ҳужумчилар етишмовчилиги ҳақида гапира олмайман, гол урадиган ҳужумчилар етарлича топилади. Биринчи навбатда Кейн ҳақида гапирин ўринли, ахир куни кеча уни ҳеч ким билмас эди, ҳозир эса Гарри "Тоттенҳэм" етакчиларидан бирига айланган. У ўз устида жуда қаттиқ ишлади, бу борада унинг устозлари ҳам эътирофга лойиқ. Тим Шервуд ва Лес Фердинанд йигитчанинг ўсиши учун кўмаклашдилар.

Кўпчилик юқори баҳога муносиб кўрмаётган Остин ҳақида ҳам гапирмай ўта олмайман. Агар Чарли майдон бўйлаб елдек уча олмаса, бу унинг ҳеч нарсага арзимаслигини билдирмайди. Мен қуйи дивизионларда ҳар турли синовлардан ўтиб элитага қадам қўйган ҳужумчиларни кўп кўрганман. Шунинг учун ҳам Остиннинг "КПР"даги муваффақиятлари ўйинлари мен учун сюрприз эмас.

Яқин орада фақат ушбу икки ҳужумчигагина имконият берилиши мумкин. Саидо Бераино ва Дэнни Ингс ҳам эътиборга лойиқ ҳужумчилардан", - дейди Хожсон Daily Mail мухбири билан суҳбатда.