Жанубий Кореянинг «Best Eleven» нашри терма жамоамиз бош мураббийи Миржалол Қосимовдан олган қисқача интервьюсини эълон қилди. Корейс футбол жамоатчилигига яхши таниш бўлган терма жамоамиз сардори Сервер Жепаров ҳақида Миржалол Қосимов қуйидагича фикр билдирган:

«Сервер бизнинг жамоамиз таркибидаги ҳақиқий сардор ва муҳим футболчи ҳисобланади. У жамоадошларини ўз ортидан эргаштирса ва ёрдам берса, шунинг ўзиёқ жамоамизга катта фойда беради. Сервер Жепаров ва Тимур Кападзени ҳақиқий лидер деган бўлардим. Бизнинг жамоамиз ёшариб бормоқда ва таркибда Жепаров каби футболчилар борлиги анча фойдалидир».

Корейс нашри шунингдек, ЖЧ-2014 саралаш босқичини ёдга олиб ўтган ва шундай ёзади:

«Миржалол Қосимов бошчилигидаги Ўзбекистон терма жамоаси жаҳон чемпионати саралаш босқичидаги муваффақиятсизлик ўрнини Осиё Кубогидаги ғалабалар орқали қоплашни истамоқда. Ўзбек футбол мухлислари ҳали ҳамон 1 тагина гол камлиги туфайли ЖЧдан қуруқ қолишганлигини афсус билан эслашмоқда».

Корейс нашрига терма жамоамиз бош мураббийи бу ҳақда қуйидагиларни айтиб берди:

«Биз ҳар бир ўйинда ғалаба қозонишга бўлган катта иштиёқ билан ўйнаганлигимиз туфайли ЖЧдан четда қолганлигимиз жуда алам қилганди. Ҳаёт давом этаверади. Биз Осиё Кубогида ўз кучимизни кўрсатиш ниятидамиз».

Отабек Йўлдошев
Жанубий Корея, Сеул