«Ғалаба қозондик. Лекин масъулият барибир оғир. 2-тур олдидан хавотирим икки карра юқори. Чунки менга миллионлаб эмас, миллиардлаб қора кўзлар қараб турибди», - дея сўзлади Ален Перрин.
Хитой терма жамоаси бош мураббийи шогирдлари Саудия Арабистонини катта қийинчилик билан мағлуб этган бўлса-да хафа ҳолатда эди. Ўйиндан кейинги матбуот анжуманида франциялик мутахассис ўз дардларини тўкиб сочди:
«Бугунги майдон бундай мусобақани ўтказишга муносиб майдон эмасди. Жуда, жуда, жуда ёмон ҳолатдаги чим! Мен ҳайрон қолдим. Қайтанга машғулотлар ўтказган майдончамиздаги чимнинг ҳолати яхши эди».
14 январь куни айнан мана шу ўйингоҳда Ўзбекистон ва Хитой терма жамоалари ўзаро ҳисоб-китоб қилишади. Хитой бош мураббийи айнан шунинг учун ҳам асабийлашмоқда эди. Сўнгги йилларда Шарқий Осиёда Хитой терма жамоаси нафақат Япония ва Жанубий Кореядан, балки КХДРдан ҳам маълум маънода ортда қолиб кетди. Ҳар ҳолда шимолий кореяликлар 2010 йили ЖЧга чиқишдек улкан орзуларини амалга ошира олишган. Шунинг учун Хитой футболи раҳбарлари Ален Перриннинг олдига ушбу Осиё Кубогида юқори ўринлардан бирини эгаллаш ва Хитойнинг аввалги обрўсини тиклашни вазифа қилиб қўйган.
«Осиё Кубогида мен ниҳоятда катта масъулият остидаман. Франция Кубоги ёки Европа Чемпионлар лигасида қатнашаётгандан кам бўлмаган даражада босим остидаман. Осиё Кубоги жуда муҳим мен учун. Илк турдаги ғалаба ҳам мендаги ҳаяжонни боса олмади», - деди Хитойнинг франциялик бош мураббийи.
Фикрининг охирида у кейинги рақиб - Ўзбекистон ҳақида ўта камтарлик билан қисқагина шундай деди:
«Биз 2-турда ҳам ғалаба қозонсак, аниқ кейинги босқcиҳга чиқамиз. Бор имкониятларимизни ишга солиб, тайёргарликни кучайтиришимиз лозим. Албатта, ғалаба қозонсак яхши. Лекин ўзбеклар билан ўйинда мени дуранг ҳам қониқтиради».
Отабек Йўлдошев
Жанубий Корея, Сеул
