Душанба куни Брисбен шаҳридаги бўлиб ўтган машғулотлардан сўнг ўтган тур қаҳрамони бўлган Игор Сергеевдан ҳам қисқача интервью олдик.
— Игорь, биринчи ғалаба ва биринчи гол билан табриклаймиз...
— Раҳмат. Осиё чемпионати бу катта мусобақа. Қўлга киритилган ютуқда ғалаба тўпини киритганлигимдан жудаям хурсандман. Лекин иккинчи бўлимда ҳам 2-3та гол уришимиз учун вазиятлар етарли бўлди .Биринчи ўйин бўлганлиги ва об-ҳаво ноқулай келганлиги учун бор куч маҳоратимизни кўрсата олмадик. Биз албатта янада яхшироқ ўйнай оламиз. Бунинг учун янада қўшишимиз ва астойдил ҳаракат қилишимиз керак.
— Гол ҳақида ҳам тўхталсангиз...
— Тўғриси, шунақа вазият бўлишини роса кутгандим.Чунки, ҳимоячилар пасдан тепишга имконият беришмаётган эдилар. Тўп Жепаровга тушгач таваккал ҳимоячидан олдинроқга югурдим. Аввалига мўлжалда бироз адашдим, деб ўйладим, кейин ҳаммаси жойида эканлигини билгач голни нишонлашга тушдим.
— Энди сизларни яна бир имтиҳон кутиб турибди, асосий синов энди бошланади...
— Хитой терма жамоаси жисмоний жиҳатдан жуда кучли. Улар хоҳлаган пайтда олдинга ҳужумга ўтиб тезлик билан орқага қайтиб кела олишади. Бу борада бизга Анзур Исмоилов ҳам керакли маълумотларни айтиб ўтди. Уйлайманки бу сафар биз ҳам ўзимизнинг устун томонларимини намойиш қиламиз. Негаки бизда тажрибали ва индивидуал маҳоратга эга футболчилар бор. Қолаверса бу биринчи турда ғалаба қозонганлар ўртасидаги жуда ҳам муҳим учрашувдир ва ютган жамоа кейинги босқич масаласини ҳал қилади....
А.Абдуҳамитов, М.Ризаевлар суҳбатлашишди, Брисбен шаҳридан
