Ўзбекистон терма жамоаси 14 январь куни бўлиб ўтадиган Хитойга қарши 2-тур ўйинига тайёргарликни давом эттирмоқда. Жамоамиз Сиднейдан Брисбенга етиб келганидан кейин 2 кун давомида режа асосида шуғулланишди. Машғулот жараёнида турли тактикаларни маромига етказиш бўйича машқлар бажарилди.
Ўзбекистон терма жамоасининг машғулотларига ўзбекистонлик ва хитойлик журналистлар ташриф буюришмоқда. Миржалол Қосимов машғулотларни ОАВ вакиллари учун очиқ деб эълон қилган. Фақат ўйинолди расмий машғулотининг дастлабки 15 дақиқаси журналистлар учун очиқ ҳисобланади.
Бўлажак ўйинга хитойлик ОАВ вакиллари катта қизиқиш билдиришмоқда. Маълумотларга қараганда бу ўлкадан Австралияга 200га яқин журналист ташриф буюрган. Шунингдек, мезбон Австралиядан кейин айнан Хитойнинг мухлислари кўпчиликни ташкил қилади. Саудия Арабистонига қарши бўлиб ўтган 1-тур баҳсида уларни 11 нафар мухлислар қўллаб-қувватлашди. Улардан 7 минг нафари Хитойдан ташриф буюрган бўлса, 4 минг нафари Австралияда яшайдиган хитойликлар ҳисобланишади.
Брисбанда шаҳри ҳақида гапирадиган бўлсак, сўнгги 2 кун давомида ҳаво ҳарорати 20 даражадан паст бўлмаяпти ва кундуз куни деярли 30 даражагача кўтарилмоқда. Шу билан бирга вақти-вақти билан ёмғир ёғиб турибди. Ёмғирнинг парланиши натижасида шаҳарда дим ҳаво юзага келмоқда.
Эслатиб ўтамиз, Хитой-Ўзбекистон ўйини "Брисбен Санкорп" (52 минг ўринли) стадионида бўлиб ўтади. Ўйин Тошкент вақти билан соат 14:00да бошланади.
