Ўзбекистон миллий терма жамоаси Осиё кубоги-2015ни ғалаба билан бошлади. Терма жамоамизнинг КХДР устидан қозонилган ғалабасига нисбатан хориж матбуотида қандай муносабатлар билдирилди. Қуйида ана шундай фикрларнинг айримлари билан танишишингиз мумкин.

Чехиялик футбол журналисти Томаш Даничек ўзбекистонлик ҳужумчи Игорь Сергеевнинг ишқибози эканини ўзининг Твиттердаги саҳифаси орқали таъкидлаб ўтди. Эътиборли томони, Ўзбекистон - КХДР ўйини бошланмасидан аввал Сергеевнинг бошланғич таркибда эканини кўрганидан сўнг, "Мен фақат унинг ўйинини томоша қиламан. У ажойиб, ёш ҳужумчи. Эҳтиёт бўлинг!", дея ёзганди. Табиийки, Сергевнинг ягона гол ўйин тақдирини ҳал қилганидан кейин чехиялик ҳамкасбимиз ўз хурсандчилигини яшириб ўтирмади.

"Игорь Сергеев, шубҳасиз, Осиё кубоги-2015даги менинг энг яхши кўрган ўйинчим. Мен бутун мусобақа давомида у ҳақидаги фикрларим билан сизни "қийнайман". Унинг жарима майдончаси ичида қандай ҳаракат қилишини кўрдингизми? У ўз вақтини кутади ва тўп етказилиши билан кутилмаганда бош билан зарба беради. Мен уни ҳақиқий "жарима майдончаси футболчиси" деб айтаган бўлардим. Шунингдек, Жепаровнинг чиройли узатмасини ҳам эътироф этиш лозим. Шу боис, Сергеев Ўзбекистон терма жамоасидаги муҳим ҳужумчи. Жамоа мусобақада медалларни қўлга киритишни истаса, уни доимо майдонга тушириши лозим, - дея ёзади Томаш Даничек.

Шунингдек, Осиё кубогини Твиттер орқали кенг ёритиб бораётган @SandalsForGoalposts саҳифаси Сергеев ва Рашидовни муваффақиятли дебют билан табриклади.

“Ўйин сўнгидаги "драматик" вазифтни инобатга олмаганда, Ўзбекистон иккинчи бўлимни яхши ўтказди. Айниқса, ўйиннинг 87-дақиқасида улар "Барселона" услубида ҳужум ташкил қилишди, фақат Турсуновнинг зарбаси голга айланмади. Сергеев ва Рашидов Осиё кубогида дебют қилганига қарамай, улар яхши таассурот қолдиришди", дея қисқача таъриф бериб ўтди.