Муҳаммад Алига тегишли ноёб бокс қўлқоплари ким ошди савдосига қўйилади ТАСС нашрининг хабар беришича, Техасдаги Heritage Auctions савдо уйида Муҳаммад Алига тегишли қўлқоплар ким ошди савдосига қўйилади. Ушбу қўлқопларда афсонавий боксчи Сонни Листон устидан ғалаба қозониб, биринчи марта чемпионлик унвонини ҳимоя қилган.
1964 йилнинг 25 февралида ёш боксчи Кассиус Клей Майамида бўлиб ўтган жангда Сонни Листондан чемпионлик мақомини тортиб олган эди. Эртасига янги чемпион “Ислом миллати” диний ташкилотига аъзо бўлиб, исмини Муҳаммад Али сифатида ўзгартирган.
1985 йилнинг 25 май куни Льюистон шаҳрида (Мэн штати) Муҳаммад Али ва Сонни Листон ўртасида матч-реванш бўлиб ўтган. Биринчи раунднинг иккинчи дақиқасида Сонни Листон рақибидан зарба ўтказиб юбориб, ерга қулаган ва узоқ вақт ўрнидан турмаган. Рингга югуриб чиққан мухлислар рефери санашни охирига етказишига йўл қўймаган, Муҳаммад Али эса рақибидан жангни давом эттиришни талаб қилган. Бироздан сўнг, Листон ўрнидан турган, аммо журналистлардан бири унинг 17 сония мобайнида нокдаун ҳолатида бўлганини маълум қилган. Мухбир билан узоқ тортишувлардан сўнг, рефери ниҳоят учрашувни тўхтатган ва Муҳаммад Алининг ғалабасини эълон қилган. Бу жанг ҳанузгача баҳс-мунозараларга сабаб бўлиб келмоқда.
