Осиё Кубоги чорак финалида Ўзбекистон терма жамоасига қарши фантастик ўйин намойиш этган ҳимоячи Ча Ду Ри ушбу мусобақа якунига етгач терма жамоадаги фаолиятини якунлашини маълум қилган эди.
Чорак финалдан сўнг Жанубий Корея ОАВлари ва кенг футбол жамоатчилигидан иборат "Ча Ду Рини терма жамоада олиб қолиш ҳаракати" юзага келди ва ОАВ орқали тарғибот олиб бормоқда. Ҳозиргача терма жамоага ўн минглаб хатлар келган ва Ча Ду Рининг терма жамоадан кетишига қарши эканликларини таъкидлашмоқда. Кўпчилик Ча Ду Ри яна 3 йилгача терма жамоада ўйнай олишини айтмоқда.
Бугун футболчининг ўзи "Спортс Кёнгҳянг" газетасига интервью бериб, ўз қарори қатъийлигини яна бир бор таъкидлаб ўтди.
"Ёш ўтган сари футболчида жисмоний ҳолатини тиклаши қийин кечади. Айниқса, мана бундай қисқа муддатли турнирларда бу яққол билиниб қолади. Мен бундай ёшимда Россияга қандай боришим мумкин? (ЖЧ-2018ни назарда тутяпти) Мени шундай ҳолатда кузатиб қўйишингизни истайман. Агар қўлимдан келса терма жамоадаги укаларимга ёрдам беришда давом этардим", - деди 35 ёшли Ча Ду Ри.
Отабек Йўлдошев
Жанубий Корея, Сеул
