"Челси" бош мураббийи Жозе Моуриньо Англия лигаси кубогида "Ливерпуль" устидан қозонилган ғалабадан сўнг (1:0) фикрлари билан ўртоқлашди.

"Бу янги ""Ливерпуль" - жуда қийин рақиб, шунинг учун икки ўйин натижасига кўра жуда кучли рақибни мағлуб этганимиздан бахтиёрман.

Ўйин тақдирини 90-дақиқадан олдин урилган гол ҳал қилиши керак эди. Иккинчи бўлимда биз кўпроқ футбол ўйнадик.

Менинг Рамиресим қайтди, бу куннинг иккинчи қувончли хабари. Биринчиси - финалга чиққанимиз. Энди бир ҳафталик машғулотлардан сўнг Рамирес сафимизда.

Диего Коста билан вазиятда пенальти бўлганмиди? Агар бир нима дейдиган бўлсам, одамлар "яна Моуриньо" дейишади. Агар айтадиган бўлсам FA мени жазолайди, улар ҳар доим бунга интиладилар. Шунинг учун бу ҳақда сиз гапиринг, ҳаммаси ойдин эди.

Асосийси - биз ғалаба қозондик, футболчилар хурсанд, мухлисларга эса гап йўқ. "Уэмбли"даги финал ўзача ҳодиса. Бу тарихий жой. Мухлислар ҳар доим у ерда бўлишни истайдилар ва бизни у ерга етакладилар.

Коста "Ливерпуль"нинг икки ўйинчисига қўполлик қилди? Қарорлар ҳақида гапиришни истамайман. Нимадир ҳақида гапирсам, буни билишим керак. Агар футболчи ҳужумни қўли билан тўхтатиб қолса - бу сариқ карточка. Агар футболчи рақибни жарима майдони ичида йиқитса - бу пенальти. Майли, Коста ва пенальти ҳақида гапиринглар, аммо унга футбол ўйнашга қўйиб беринглар", - дейди Моуриньо.