“Барселона” Qatar Airways авиакомпанияси билан ҳамкорликни давом эттирмаслиги мумкин. Бу ҳақда жамоа президенти Хосеп Мария Бартомеу каталон радиоси орқали чиқишида билдириб ўтган.
“Айни пайтда клубга ҳомийлик қилиши мумкин бўлган бошқа компанияларни излаяпмиз. Қатардаги вазият ўзгарган, 4 йил олдинги муносабат ҳам йўқ. Биз ўзимизга муносиб бошқа ҳомий танлашда тезроқ қарор қабул қилишимиз керак”, – дейди Бартомеу.
Маълумот учун, икки томоннинг амалдаги шартномаси 2017 йилгача тузилган. “Барселона” мухлислари 4 йилдан бери доимий равишда жамоа раҳбариятини қатарликлар билан тузилган шартнома учун танқид қилиб келади.
Бундай танқидларга сабаблардан бири сифатида Қатар давлати 2022 йилги жаҳон чемпионати мезбонлигини спорт принципларини бузган ҳолда қўлга киритган деб қаралиши келтириб ўтилади.