“Челси” бош мураббийи Жозе Моуриньо Англия чемпионати 22 тури доирасида “Манчестер Сити”га қарши кечадиган учрашув олдидан ўтказиладиган матбуот анжуманида иштирок этишдан бош тортди. Тадбир бугун бўлиб ўтиши кўзда тутилган эди.

Ҳозирча бу борада лондонликлар томонидан ҳеч қандай расмий баёнот берилмаган. Тахмин қилинишича, португалиялик мураббий “Челси” футболчилари ҳақида айтган гапи учун Англия футбол ассоциацияси томонидан жаримага тортилганига жавобан шундай норозилик билдиришга қарор қилган.

Моуриньо бир неча бор ҳакамларни танқид қилгани учун жазоланган эди. Унинг охирги гаплари Диего Коста “Ливерпуль”га қарши кечган ўйиндаги қўполлиги учун 3 ўйинга четлатилгани билан боғлиқ бўлган. Бугун Диего Коста бу жазо борасида шикоят қилиши мумкин.