АҚШнинг Остин шаҳрида (Техас штати) ўтказилган марафон иштирокчиларидан бири, кениялик спринтер қиз Хивон Нгетик маррага эмаклаб етиб келди. Бу ҳақда The Daily Mail нашри хабар берди.
Спортчи қиз марафоннинг аксарият қисми давомида етакчилар гуруҳида чопди, бироқ маррага 50 метр қолганда тинкаси қуриб, йиқилиб тушди. 29 ёшли спортчи ёнига шифокорлар бригадаси ёрдам бериш учун ногиронлар аравачаси билан етиб келган. Бироқ кениялик югурувчи агар унга бошқалар ёрдам берса, мусобақадан четлаштирилиши мумкинлиги тушуниб, маррага ҳеч кимнинг ёрдамисиз эмаклаган ҳолда етиб келди.
Умумий ҳисобда Нгетик 3 соат 4 дақиқа 2 сония вақт билан мусобақада учинчи ўринни эгаллади. Марафонда 2 соат 54 дақиқа 22 сония вақт билан унинг ҳамюрти Синтия Жероп ғолиб бўлди.
Маълумот учун, Остиндаги марафон илк бор 1991 йилда ўтказилган. Остиндаги марафон Даллас ва Хьюстонда ўтказиладиган марафонлар билан бирга “Техас марафонлари” сериясининг бир қисми ҳисобланади. Бу мусобақалар анъанавий тарзда қиш ойлари ўтказилади.
