Лас-Вегасда шу йилнинг 2 май куни америкалик боксчи Флойд Мэйуэзер ва филиппинлик боксчи Мэнни Пакьяо ўртасида бўлиб ўтадиган жанг учун сотувга чиқарилган чипталар 15 дақиқа ичида сотиб бўлинди. Бу ҳақда USA Today нашри хабар берди.

Чипталар Мэйуэзернинг бу жангни ўтказиш бўйича шартномани имзолагани ҳақида маълумот пайдо бўлганданкейин сотувга чиқарилди ва деярли бир зумда сотиб бўлинди.

Бундан ташқари, учрашув ўтказиладиган MGM Grand меҳмонхонасидаги барча хоналар 1 ва 2 май кунлари учун бир неча дақиқа ичида банд қилиб қўйилди. Бу саналар учун меҳмонхона хоналарида бир кечани ўтказиш нархи 615 долларгача кўтарилиб кетган.

Жанг ўтказиладиган спорт саройининг сиғими 17 минг ўриндан иборат. Бироқ трибуналардаги баъзи бир ўзгартиришларни амалга ошириб, унинг сиғимини 18 мингтагача ошириш мумкин. Мэйуэзер 2007 йилнинг март ойидан бошлаб ўзининг жангларини фақат MGM Grand меҳмонхонасида ўтказиб келади.

Маълумот учун, бу жангни ўтказиш бўйича музокаралар ярим йил давом этди. ОАВларнинг хабар беришича, Пакьяо гонорар олишда 40 фоизга 60 фоиз нисбатда Мэйуэзер ҳисобига ён босишга тўғри келган. Филипинллик боксчи, шунингдек, допинг-тест топширишга рози бўлган. Боксчилар ярим ўрта вазн тоифасида Бутунжаҳон бокс кенгаши (WBC), Бутунжаҳон бокс уюшмаси (WBA) ва Бутунжаҳон бокс ташкилоти (WBO) таснифлари бўйича чемпионлик камари учун жанг қилишади.

24 февралда 38 ёшга тўладиган Мэйуэзер профессионал рингда ўтказган барча 47 жангини ғалаба якунлаган. 36 ёшли Пакьяо 64 та жангдан 57 тасида ғалаба, 5 тасида мағлубият ва 2 тасида дуранг натижага эришган.