"Ал-Ҳилол" ва “Локомотив” жамоалари ўртасидаги ўйиндан олдинги матбуот анжуманида бош мураббий Вадим Абрамов билан бирга жамоа сардори Ислом Тўхтахўжаев иштирок этишди.

— Ўйин қизиқарли бўлади. Рақибни яхшилаб ўрганиб чиқдик. Улар ҳам худди бизнинг жамоага ўхшаб тўпни ўзида сақлаб туриш ва у билан кўпроқ муомала қилишни ёқтиришди. Умид қиламанки, биз эртага ғалаба қозонамиз, — дейди Ислом.

— Статистикани олиб қарасак, “Ал-Ҳилол”нинг бу мусобақадаги кўрсаткичлари “Локомотив”никидан анча юқори, рейтинг бўйича ҳам анча устун туради. Бу факт футболчилар учун қандайдир аҳамиятга эгами?
— Бу нарсанинг эртанги ўйинга мутлақо алоқаси йўқ. “Локомотив” турнирда янги бўлишига қарамай, жамоанинг асосий қисми терма жамоа вакиллари ҳисобланади ва улар бундай катта ўйинларда анчагина тажриба тўплаган. Шундоқ экан, сиз айтган фактга биз аҳамият бермаймиз.