Халқаро бокс уюшмаси (WBA) рейтинг қўмитаси ўта оғир (90,7 кг дан юқори) вазндаги жаҳон чемпиони, ўзбекистонлик Руслан Чагаевга (33 ғалаба, 2 та мағлубият, 1 та дуранг, 20 та нокаут) WBA рейтингида 4-ўринда турувчи австралиялик боксчи Лукас Браун (22 та жангдан 22 та ғалаба, 19 таси нокаут билан) билан жанг ўтказиш мажбуриятини қўйди.

WBA рейтинг қўмитаси иккала томонга ҳам умумий келишувга келиб, ташкилотни жангнинг ўтказилиши санаси ва жойи ҳамда ташкилий тадбирларнинг бошланиши ҳақида хабардор қилиш учун 30 кунлик мухлат берган.

Аввалроқ, 2014 йилнинг 6 июлида Руслан Чагаев Пуэрто-Рико вакили Фрес Окендо билан ўтказган жангида ҳакамлар қарори билан ғалаба қозонган эди ҳамда WBA таснифи бўйича жаҳон чемпиони бўлганди.

Маълумот учун, WBA’нинг мутлақ чемпиони мавқеига айни дамда Владимир Кличко эгалик қилади.