Болгария пойтахти София шаҳрида давом этаётган бокс бўйича анъанавий “Странжа” халқаро турнирида ярим финалчилар маълум бўлди.

Европа қитъасида ўтказилиб келинадиган энг қўхна турнирлардан (66-бор ташкил этилди) бири ҳисобланган мазкур мусобақада мамлакатимиз чарм қўлқоп усталари муваффақиятли иштирок этишмоқда.

Эътиборлиси, ярим финалга йўл олган спортчилар орасида энг кўп вакил Ўзбекистон терма жамоаси аъзолари ҳисобланади. Яъни финал йўлланмаси учун рингга кўтариладиган жами 40 нафар спортчидан 9 нафари мамлакатимиз боксчилари ҳисобланади.

Бу борада кейинги кўрсаткич Болгария терма жамоасига тегишли. Мезбон спортчилардан 8 нафари ярим финалга чиқишган. Агарда ушбу рўйхатни давом эттирадиган бўлсак, Қозоғистондан 5 нафар, Украинадан 4 нафар, Грузиядан 3 нафар, Озарбайжон, Арманистон, Исроил ва Туркиядан 2 нафардан, Хитой, Англия ва Уэльсдан 1 нафардан чарм қўлқоп усталари ярим финалга етиб келишган.

Бугун ўтказиладиган ярим финал баҳсларида боксчиларимизнинг рақиблари қуйидагилар:

49 кг. Абдулла Қўчқоров (Ўзбекистон) – Артур Оганесян (Арманистон)
52 кг. Шаҳобиддин Зоиров (Ўзбекистон) – Стефан Иванов (Болагрия)
56 кг. Муроджон Аҳмадалиев (Ўзбекистон) – Юрий Шестак (Украина)
64 кг. Фазлиддин Ғоипназаров (Ўзбекистон) – Батухан Гозгек (Туркия)
69 кг. Исроил Мадримов (Ўзбекистон) – Ярослав Самофалов (Украина)
75 кг. Бектемир Мелиқўзиев (Ўзбекистон) – Валерий Харламов (Украина)
81 кг. Элшод Расулов (Ўзбекистон) – Николоз Шехниашвили (Грузия)
91 кг. Рустам Тўлаганов (Ўзбекистон) – Леван Гуледани (Грузия)
+91 кг. Баҳодир Жалолов (Ўзбекистон) – Петар Белберов (Болгария)