Самвел БАБАЯН ("Пахтакор" бош мураббийи):
- Бугун қўлимизда турган ғалабани бой бердик. Ҳисобда олдинда бўлган пайтда ҳам қулай имкониятларга эга бўлгандик. Лекин биргина хато бизга қимматга тушди. Рақиб қарши ҳужумда бизни жазолади. Ўйиндан келиб чиқиб айтадиган бўлсам, икки очкони йўқотдик.
Ораховац бугун хатоларга йўл қўйди, лекин бу ўйин жамоанинг мавсумдаги иккинчи расмий учрашуви эканлигини унутмайлик. У ҳар иккала баҳсни ҳам Чемпионлар лигаси доирасида ўтказди. Шунингдек, бугун ҳимояда Мерзляков ҳам, Ҳошимов ҳам хатоларга йўл қўйишди. Жамоанинг асосий футболчилари бунақа хато қилса, биз учун жуда қийин.
Биринчи бўлимда рақибни тўлиқ ўрганишга ҳаракат қилдик. Бошиданоқ ҳужумга ўтиб, қийналиб қолиш мумкин. Бундай рақибларга қарши ўйин бошиданоқ ташаббусни қўлга олишга тайёр эмасмиз ва бунга босқичма-босқич чиқиб борамиз.
Искандеровга жамоа номидан миннатдорчилик билдирамиз. Икки кундан бери иссиғи чиқиб, шамоллаган бўлишига қарамай, майдонга тушишини айтди. Характер кўрсата олганлиги учун ҳам унга раҳмат. Соҳибов ва Машариповни ўйинни кучайтириш учун туширдик.
