Бугун соат 22:15да “Насаф” – “Ал-Аҳли” учрашуви бошланади. “Аждарлар” ҳозиргина ўзларига ажратилган автобусда стадион томон йўлга чиқишди, дея хабар бермоқда воҳа.уз сайти.

Бизга “Насаф” ПФК матбуот хизматининг раҳбари Азиз Нурийнинг хабар беришича, йигитларнинг кайфияти аъло даражада. Чамаси 45 дақиқа йўл юрилгач, жамоа “King Abdulaziz sports sity” – “Қирол Абдулазиз” стадионида бўлишади.

Ушбу стадион Жидда шаҳрида “Қирол Абдулазиз спорт шаҳарчаси”, – деб ҳам юритилади. Спорт шаҳарчаси 30 гектар ер майдонида жойлашган бўлиб, бу ерда стадиондан ташқари жуда кўп спорт иншоотлари ҳам бор. “Насаф” жойлашган меҳмонхона билан стадион ораси 35 километрни ташкил қилади.

Ўзбекистондан борган мухлисларнинг ҳам дастлабки гуруҳи аллақачон Жидда шаҳрига етиб боришган. Ўзбекистон футбол мухлислари етакчиси – Абдураҳмон Фозилов ва “Насаф” мухлислари клуби фаоллари – Ўктам Узоқов ва Зиёдулла Сафаровлар бошчилик мухлисларнинг катта гуруҳи айни пайтда Ар-Риёддан Жидда шаҳрига автобусда келишмоқда. Улар тахминан 12 соат йўл юришади. Ўйинга 1.5 соат қолганда стадионга етиб келишади. Сўнг ҳаммалари стадионга ташриф буюришади. Демак, бугун стадионда мухисларга Абдураҳмон Фозилов бош бўлади.