«Ульсан Хёндэ» Жанубий Корея кей-лигаси 2015 йилги мавсуми 1-турини ОЧЛда мамлакат шарафини ҳимоя қилаётган «Сеул»ни доғда қолдириш билан бошлади. Бош мураббий Юн Жонг Хван ўйиндан кейинги матбуот анжуманида хурсандлигини яширмади.

«Кей-лигада биринчи ўйинни ғалаба билан бошлаш ёқимли. Қисқа муддатли тайёргарлик билан бундай натижага эришиш эса мақтовга лойиқ иш, — дея гап бошлади у. «Ўз дарвозамиз дахлсизлигини сақлаб қолганимиздан мамнунман. Янада кўпроқ гол кирита олишимиз мумкин эди. Менинг футбол фалсафам шундай: ҳимояни маҳкам ушлаган ҳолда олдинга ўтиб ҳужумга ташланиш. Ўз дарвозангдан гол ўтказмадингми, демак, ўйинда албатта ғалаба қозона оласан».

Шунингдек, «Ульсан» бош мураббийи катта умидлар билан жамоага олиб келинган ҳамюртимиз Сервер Жепаров ҳақида ҳам илиқ фикрларини билдирди:

«Жамоага қўшилиш жараёни жуда чўзилиб, кечроқ сафимизга келган бўлса ҳам Сервернинг ростгўйлиги ва маҳорати менга ёқади. У якка тартибда ҳам яхши шуғулланди. Шунинг учун мен унинг маҳоратига ишондим. Менинг ўйлашимча, нега Сервер Жепаров каби футболчилар майдонга тушмаслиги керак? У жамоамизга жуда керакли футболчи».

Отабек Йўлдошев
Жанубий Корея, Сеул