Xitoy Super ligasida endi faqatgina uch nafar xorijlik futbolchi maydonda harakat qilishi mumkin. Bu haqda «Sports.ru» nashri xabar berdi.

Yangi qoidaga ko‘ra, o‘yin qaydnomasidan besh nafar legioner futbolchi o‘rin egallashi uchun imkon beriladi. Shularning faqatgina uch nafari bir vaqtning o‘zida maydonda to‘p sura oladi. Bundan tashqari, har bir klub uchrashuv qaydnomasiga ikki nafar 23 yoshgacha bo‘lgan futbolchini kiritishi kerak. Ulardan biri asosiy tarkibda to‘p surishi shart.

Mahalliy ommaviy axborot vositalari Xitoy futbol fedarasiyasi bu qarorga mamlakat hukumatining ta’siri ostida kelganini qayd etgan. Uning qachon kuchga kirishi hozircha aniq emas, lekin bundan barcha klublar voqif qilingan. Qayd etish kerak, Xitoy chempionatida yangi mavsum 4 mart sanasida start oladi.

Avvalroq Xitoy chempionatida bir nafar osiyolik va to‘rt nafar xorijlik futbolchini qaydnomaga kiritish mumkin bo‘lib, maydonda osiyolik va yana uch nafar boshqa legioner harakat qilishi mumkin edi. Yangi qaror esa osiyolik futbolchilar imkoniyatini pasaytirib yuborishi mumkin.

Masalan, «Shanxay SIPG» bosh murabbiyi Andre Villash-Boash maydonga Odil Ahmedovni tushirishi uchun Elkesen, Oskar, Xalk va Rikardu Karvalyu kabi futbolchilardan istalgan ikkitasini zaxirada qoldirishga majbur bo‘ladi. Ahmedov bunga erisha oladimi yoki yo‘q, aytish qiyin.