O‘zbekiston milliy terma jamoasi JCH–2018 turniriga saralash bosqichi ikkinchi davrasiga tayyorgarlik ko‘rish maqsadida Turkiyaning Antaliya shahrida qisqa muddatli o‘quv-yig‘in mashg‘ulotlarini boshlagani haqida xabar berilgandi.
Terma jamoa 12 fevralga qadar mashg‘ulotlar o‘taydi hamda Rossiyaning “Amkar” (10 fevral) va Armanistonning “Alashkert” (11 fevral) klublariga qarshi nazorat o‘yinlarida maydonga tushadi.
O‘zbekiston milliy terma jamoasi yarim himoyachisi Ikrom Aliboyev va darvozabon Eldor Suyunov jarohatlari sabab mazkur yig‘inda ishtirok eta olmaydigan bo‘ldi.
“Lokomotiv” yarim himoyachisi klub mashg‘ulotlarida jarohat olgan va “temiryo‘lchilar”ning safida alohida shug‘ullanmoqda. “Nasaf” posboni esa bir muddat avval safdan chiqqandi. Suyunov jarohati sabab “Nasaf”ning “Al-Fath”ga qarshi (0:1) OCHL–2017 pley-off uchrashuvini o‘tkazib yuborishga majbur bo‘lgan edi. Tajribali darvozabon Toshkentda qoldi.
Ta’kidlash joiz, Ikrom Aliboyev jarohati sababli 21–24 yanvar kunlari terma jamoaning BAAdagi yig‘inida ham ishtirok eta olmagan edi.
