Surxondaryo viloyatining “Surxon” (Termiz) professional futbol klubi 2017 yilgi mavsumda mamlakat birinchi ligasida qatnashib, oliy ligaga chiqish uchun kurash olib boradi.
Ma’lumki, 2016 yilgi mavsum yakuniga ko‘ra, o‘tish turnirida munosib qatnashgan “Neftchi” (Jarqo‘rg‘on) jamoasi birinchi ligaga yo‘llanma olgan bo‘lsa-da, uy uchrashuvlarni o‘tkazish uchun ushbu tumanda yaratilgan shart-sharoitlar, sport bazasi va stadioni O‘zbekiston Professional futbol ligasi talablariga javob bermaydi. Shu tufayli viloyat hokimligi viloyat futbol federasiyasi va “Neftchi” futbol klubi rahbariyati bilan kelishilgan holda O‘zbekiston XXVI milliy chempionati birinchi ligasida “Surxon” (Termiz) professional futbol klubi ishtirok etadigan bo‘ldi.
Viloyat hokimi, viloyat futbol federasiyasi prezidenti Erkinjon Turdimov yig‘ilishda birinchi liga musobaqalarida “Surxon” klubining avvalgi shuhratini tiklash, Termiz shahridagi “Alpomish” stadionida birinchilik uchrashuvlarini yuqori saviyada o‘tkazish va muxlislar uchun zarur shart-sharoit yaratish dolzarb vazifa ekanligini ta’kidladi. Yig‘ilishda “Surxon” (Termiz) professional futbol klubi prezidenti etib viloyat hokimi o‘rinbosari Abdujalil Abduqodirov, E. Xolboboyev esa futbol klubi ijrochi direktori, Vali Keldiyev bosh murabbiy etib tayinlandi. “Surxon” klubi 1968 yilda tashkil qilingan. 2018 yilda jamoa tuzilganiga roppa-rosa yarim asr bo‘ladi. O‘zbekiston Oliy ligasida 2000, 2002 va 2003 yillarda 9-o‘rinni egallagan. 2002 va 2003 yillarda O‘zbekiston Kubogi yarim finalida ishtirok etgan. 1968—1968 — «Chegarachi»; 1969—1973 — «Avtomobilist»; 1974—1974 — «Spartak»; 1975—1983 — «Avtomobilist»; 1984—1984 — «Surxon» (Surxon); 1985—1993 — «Surxon»; 1994—1996 — «ASK»; 1997—2008 — «Surxon»; 2009—2010 — «Dinamo-Hamkor»; 2012 yildan— «Surxon».
