14 mart kuni poytaxtimizda yunon-rim kurashi bo‘yicha xalqaro turnir start oldi.
Yunon-rim kurashi bo‘yicha O‘zbekiston terma jamoasi bosh murabbiyi Kamil Fatxulin sovrini uchun tashkil qilingan musobaqada 2001-2002 yillarda tug‘ilgan yosh sportchilar o‘z imkoniyatlarini sinab ko‘rishmoqda. Turnirda O‘zbekiston vakillaridan tashqari Rossiya, Qozog‘iston, Qirg‘iziston, hamda Tojikiston sportchilari ishtirok etishayotganini ta’kidlash kerak.
5-bor o‘tkazilayotgan an’anaviy turnirda bu yil 5 ta mamlakatning 330 nafar sportchisi 11 ta vazn toifasida g‘oliblik uchun kurash olib boradi. Eng yengil vazn toifasi -38 kg. bo‘lsa, eng og‘ir vaznda kurash 100 kg.gacha bo‘lgan sportchilar o‘rtasida bo‘lib o‘tadi.
Respublika Olimpiya Zahiralari Kollejida joylashgan sport majmuasida bo‘lib o‘tayotgan musobaqa g‘oliblari, 15-mart kuni bo‘lib o‘tadigan final bahslaridan so‘ng ma’lum bo‘ladi.
