Norvegiyaning Josimar jurnali "Sankt-Peterburg qullari" nomli maqola chop etdi.
Unga ko‘ra, Krestovskiy orolidagi stadion qurilishida KXDRlik 110ta mehnat muhojiri ishlamoqda va ularning ko‘pchiligida hech qanday huquq yo‘q, bir inson esa vafot etgan.
Ishchilar qurilish vaqtida stadion yaqinidagi ombor konteynerlarida yashashgan. Noyabr oyida ularning biri o‘lik holda topilgan. O‘lim sababi yurak xuruji bo‘lgan. FIFA surishtiruv olib borishni va’da qilgan, ammo hozircha uning natijalarini e’lon qilmagan.
Ishchilarning biri ular ertalab soat 7 dan kech 12gacha ishlashlarini aytgan. Ularda dam olish kuni yo‘q, maoshlarining 90 foizini KXDR hukumati olishini aytgan. Ta’kidlanishicha, arenada KXDRda amal qilinadigan quldorlik sxemasidan foydalaniladi. Ko‘pchilik ishchilarni vositachi firmalar bilan 10 yillik shartnoma bog‘lab turadi. BMT ma’lumotiga ko‘ra, bu mamlakat bu ishchilarning mehnati orqali yiliga 2 mlrd dollar ishlab topadi.
