Malayziya poytaxti Kuala-Lumpur shahrida bugun, 21 aprel kuni 16 yoshgacha bo‘lgan futbolchilar orasida 2018 yili bo‘lib o‘tadigan Osiyo chempionatiga saralash bosqichiga qur’a tashlash marosimi bo‘lib o‘tdi.

Qur’a marosimida OFKga a’zo 45 mamlakat federasiyasi (assosiasiyasi) ishtirok etdi. Unga ko‘ra, O‘zbekiston G‘arb mintaqasining “A” guruhiga tushdi va final yo‘llanmasiga ega chiqish uchun Saudiya Arabistoni, Iordaniya, Bahrayn va Shri-Lanki termalariga qarshi bahs olib boradi.

Saralash bosqichi reglamentiga ko‘ra, guruhda birinchi o‘rinni olgan 10 jamoa hamda guruhda ikkinchi o‘rinni egallagan eng yaxshi besh jamoa U-16 Osiyo chempionati mezboniga qo‘shilgan holda final bosqichiga yo‘llanma oladi.

U-16 Osiyo chempionatiga saralash bosqichi shu yilning 16–24 sentyabr kunlari bo‘lib o‘tadi. O‘zbekiston joy olgan “A” guruhi uchrashuvlariga Saudiya Arabistoni mezbonlik qiladi. Musobaqaning final bosqichi esa 2018 yilning 20 sentyabr – 7 oktyabr kunilari o‘tkaziladi.