«Manchester Yunayted» ustozi Joze Mourinyo Yevropa ligasi haqidagi fikrini keskin o‘zgartirgani ma’lum bo‘ldi.

Independent xabariga ko‘ra, 2013 yilda Mourinyo «Chelsi»ga qaytganida, bu musobaqani pisand qilmasdan gapirgan.

«Evropa ligasida g‘olib chiqishni xohlamayman. Bu musobaqadagi yutuqdan ranjigan bo‘lardim. Futbolchilarim ham uni bizga mos musobaqa deb hisoblashini istamayman» - degan Mourinyo 2013 yilda.

2017 yilda «Manchester Yunayted» bilan Yevropa ligasi finaliga yo‘l olgan Mourinyo boshqacha gapirmoqda.

«Agar Yevropa ligasida g‘olib chiqsam, baxtiyor bo‘laman. Bu juda zo‘r bo‘lardi. Bu sovrinni qo‘lga kiritib, Chempionlar ligasiga qaytishimiz mumkin. Natijada mavsumni muvaffaqiyatli yakunlaymiz» - dedi Mourinyo.