«Sevinch» – «Bunyodkor W» (3:0) jamoalari o‘rtasidagi uchrashuv nihoyasiga yetgach, jamoamiz ustozi Vladislav Xan o‘yin haqidagi fikrlarini aytdi.

"Jamoamizda yana g‘oliblik ruhi tiklanayotganidan mamnunman. Negaki, o‘tgan chempionat nihoyasiga yetgach, tarkibimizni ko‘plab tajribali futbolchilar tark etgan edi. Ularning o‘rnini hali oliy ligada to‘liq tajriba to‘plamagan, yosh futbolchilar bilan to‘ldirgan edik. O‘zingiz bilasiz, yetarli tajribaga ega bo‘lmagan yosh futbolchilar bilan ko‘zlangan maqsadga erishish mushkulroq. Ammo biz o‘z o‘yinchilarimizni tezroq o‘ziga bo‘lgan ishonchni ortirish, ularga g‘oliblik ruhini singdirish bo‘yicha tinmasdan ishlayapmiz. Bu mehnatlarimiz endi natijasini ko‘rsata boshladi. Bunga misol qilib, bugungi uchrashuvdagi g‘alabani keltirish mumkin. «Bunyodkor W» jamoasi bu yilgi  chempionatda to‘liq natijaga erishib kelayotgan jamoa edi. Shogirdlarim bugun oldilariga qo‘yilgan vazifani ajoyib tarzda ado etishdi. Biz bugun ishonchli g‘alabaga erishdik. Bundan xursandmiz.

To‘g‘ri, hali kamchiliklarimiz bor, buning ustida ishlarimizni susaytirmaymiz va klubimizning g‘olibona yurishini davom ettiramiz", – dedi Vladislav Xan.