O‘zbekiston Kubogi 1/8 finalidan o‘rin olgan «Dinamo» va «Olmaliq» jamoalari o‘rtasidagi dastlabki o‘yin durang natija bilan yakunlandi.

Ushbu bahsda har ikki jamoa ham asosiy tarkibni tushirdi deyish qiyin. Uchrashuvni hujumkor boshlagan mezbonlar 12-daqiqada hisobni ochishdi. Burchakdan Orif Mamajonov tomonidan yetkazib berilgan to‘pni Shohruh Xolmatov bosh bilan «Olmaliq» darvozasiga kiritdi, 1:0.

Jamoalar ushbu natija bilan tanaffusga chikib ketish arafasida turganlarida, Zabihullo O‘rinboyev muvozanatni tikladi, 1:1.

Ikkinchi bo‘limda samarqandlik futbolchilar g‘alaba ilinjida o‘yin tizginini qo‘lga olib hujumkorlikka urg‘u berishgan bo‘lishsada, omad mehmonlarga kulib boqdi. Sardor Sulaymonov, Abdumalik Abdullayev, Javohir Qahramonov, Amirjon Safarovlar o‘yin davomida bir qator vaziyatlarga ega bo‘lishgandi, ammo omad ulardan ochiqchasiga yuz o‘girdi.

Qarshi hujumlarda esa gohida Temur Jo‘rayev jamoa joniga oro kirgan bo‘lsa, gohida tajribali Aleksey Nikolayev va yosh Hakimxon A’lamxonov himoya tandemi ishonchli o‘yin namoyish etdi. Tomoshabop o‘tgan bahsda «Dinamo» har qancha hujumkor o‘yin namoyish etmasin, bahs murosali durang bilan intiho topdi – 1:1.

Javob uchrashuvi 31 may kuni Olmaliq shahrida o‘tkaziladi.

O‘zbekiston Kubogi. 1/8 final.

22 may (dushanba)

«DINAMO» - «OLMALIQ» - 1:1

Samarqand, 7200 tomoshabin.

Hakam: Hasan Ro‘ziyev (Toshkent).

Gollar: Shoxrux Xolmatov 12, - 1:0. Zabihillo O‘rinboyev 45, - 1:1.

«Dinamo»: Temur Jo‘rayev, Mirkomil Lokayev, Hakimxon Alamxonov, Jasur Azimov (Jasur Qurbonov, 71), Abdumalik Abdullayev, Shoxruh Xolmatov, Aleksey Nikolayev, Orifjon Mamajonov (Javohir Qahramonov, 59), Iskandar Xolmirzayev, Saidjamol Davlatjonov, Amirjon Safarov (Sardor Sulaymonov, 52).

«Olmaliq»: Xurshid Xo‘jayev, Abduqahhor Xojiakbarov, Dilshod Jo‘rayev, Alibobo Rahmatullayev (SHota Grigalashvili, 45), Zabihillo O‘rinboyev (Doniyor Usmonov, 77), Shoxnazar Norbekov, Viktor Klishin, Islom Inomov, G‘ulom Haydar G‘ulomov, Rahmatullo Berdimurodov, Vladislav Kasminin.