“Nasaf” 30 may, seshanba kuni O‘zbekiston Kubogi 1/8 finalining javob uchrashuvida “Paxtakor”ni qabul qiladi. Xabaringiz bor, 22 may kuni Toshkentda bo‘lib o‘tgan dastlabki uchrashuvda “ajdarlar” 3:0 hisobida g‘alaba qozonishgan. Uchrashuv G‘uzor shahridagi, “G‘uzor” markaziy stadionida soat 18:30da boshlanadi.

O‘zbekiston Kubogi-2017. 1/8 finali javob uchrashuvi
“Nasaf” (Qarshi) - “Paxtakor” (Toshkent)
30.05.2017. “G‘uzor” markaziy stadioni. 18:30da
Hakamlar: Zokir Qodirov (Navoiy), Obid Jumayev, Ruslan Samandarov (barchasi — Navoiydan), Komiljon Rasulov (Qashqadaryo vil.)
Nazoratchi: Rashid Aytekov (Toshkent).
Dastlabki uchrashuv: “Paxtakor” – “Nasaf” 0:3

Mazkur jamoalar O‘zbekiston Kubogi bahslarida 15 marta to‘qnash kelishgan. Ularning 4 tasida “Nasaf”, 6 tasida “Paxtakor” zafar quchgan. 5 uchrashuvda durang qayd etilgan. Jamoalar kubok finallarida ham ikki marta, 2003 va 2011 yillar o‘zaro hisob-kitob qilishgan.

“Nasaf” va “Paxtakor” jamoalari O‘zbekiston superkubogida ham bir marta kuch sinashishgan. Bu uchrashuv o‘tgan yili Toshkentdagi “Bunyodkor” stadionida bo‘lib o‘tgan. Unda qarshiliklar 1:0 hisobida ustun kelgan.

Mazkur jamoalar bu yilgi O‘zbekiston  Kubogi bahslarining 1/8 finalida tuqnash kelishdi. Yuqorida aytganimizdek, 1/8 finalining dastlabki uchrashuvida “Nasaf” raqibini 3:0 hisobida mag‘lub etdi.

Javob uchrashuvi ham juda qiziqarli va keskin bo‘lishi turgan gap. Bunga sabablar talaygina. “Paxtakor” jamoasi dastlabki uchrashuvdagi hisob tasodif ekanligini isbot qilishga urinsa, “Nasaf” bu yilgi kubok bahslarida ham o‘z oldiga jiddiy maqsadlarni qo‘yganligini isbotlash uchun maydonga tushadi. Albatta, bu yilgi kubok uchun kurashda, keyingi bosqichga chiqish uchun Berdiyev shogirdlarida imkon ko‘proq.

Umuman olganda bu uchrashuvdan ko‘proq muxlislar yutishadi. Chunki, bu jamoalar o‘rtasidagi hoh chempionat, hoh kubok uchrashuvlari bo‘lsin, doimo murosasiz va kurashlarga boy tarzda o‘tgan.