O‘zbekiston kubogidan o‘rin olgan "Bunyodkor” – “Sho‘rtan” (3:0) uchrashuvidan keyin “qaldirg‘ochlar” ustozi Mirjalol Qosimov o‘z fikrlarini aytdi.

"Uchrashuvni o‘zimiz istagandek o‘tkazdik. Chiziqlar orasidagi bog‘liqlik, tezkor va pressing futbol yaxshi chiqdi. Hisobdan ham qoniqdik. Biroq vaziyatlarni golga aylantirishda yana ham aniq o‘ynashimiz kerak. Avvalgi matbuot anjumanlarida ta’kidlab o‘tgan edim, gol urish borasidagi statistikamiz maqtanarli emas. Bu borada ishlashda davom etamiz. Jamoa oldiga Osiyo Chempionlar ligasiga yo‘llanma olish vazifasi qo‘yilgan. Bu boradagi eng yaqin yo‘l – mamlakat kubogi. Shunday ekan, kubokdagi har bir bahsda jiddiy e’tibor qaratishimiz lozim. Qolaversa, chempionatdagi o‘yinlarimizda ham kerakli ochkolarni jamg‘arishimiz darkor. Ilgarilari jamoa kuchiga o‘rta chiziqqa nazar solib baho berilardi. Hozir esa bu holat zahira o‘rindig‘iga qarab aniqlanmoqda. Zaxira o‘rindig‘imiz juda qisqa. Davralar oralig‘ida imkon qadar tarkibni kuchaytirishga harakat qilamiz. Raqobatni kuchaytirmas ekanmiz, o‘yinimizni ham o‘zgartira olmaymiz", - dedi Mirjalol Qosimov.