O‘zbekiston milliy terma jamoasining JCH–2018 turniriga saralash bosqichi “A” guruhidagi guruhdoshi – Suriya terma jamoasi kecha, 1 iyun kuni Ummonga qarshi o‘rtoqlik uchrashuvini o‘tkazdi.

Ummon poytaxti Muskat shahrida bo‘lib o‘tgan o‘yinda 1:1 hisobidagi durang natija qayd etildi. Uchrashuvning 56-daqiqasida ummonliklar hisobni ochgan bo‘lsa, asosiy vaqtga qo‘shib berilgan daqiqalarning so‘nggisida Suriya vakillari hisobni tenglashtirdi.

Ertaga, 4 iyun kuni milliy terma jamoaning guruhdagi raqibi – Eron termasi O‘zbekistonga qarshi o‘yin oldidan Chernogoriyaga qarshi o‘rtoqlik o‘yinini o‘tkazadi. Karlush Keyrush bosh murabbiyligidagi jamoa Avstriyadagi o‘quv-mashg‘ulotlar yig‘inini tugatib, Podgorisaga yo‘l oldi.

O‘zbekiston terma jamoasi Eronga qarshi o‘yindan avval Toshkentda Tailand termasi bilan to‘qnash keladi. Ushbu o‘yin 6 iyun kuni “Bunyodkor” stadionida, soat 20:00 da boshlanishi ko‘zda tutilgan.

Eslatib o‘tamiz, “A” guruhi 7-turidan keyin Eron 17 ochko bilan peshqadamlik qilayotgan bo‘lsa, 13 ochko jamg‘argan Janubiy Koreya ikkinchi pog‘onada bormoqda. O‘zbekiston terma jamoasi 12 ochko bilan uchinchi o‘rinni band qilgan. 4–6 o‘rinlarni mos ravishda Suriya (8 ochko), Xitoy (5 ochko) va Qatar (4 ochko) termalari egallagan.