Mavsum avvalida Joze Mourinyu tufayli “Manchester Yunayted”ga o‘tgan Zlatan Ibragimovich endi aynan Joze tufayli jamoasiz qoldi. Gap shundaki, ketma-ket gollar urib, jamoasini oldinga yetaklab turganida portugaliyalik mutaxassisning sevimli futbolchisiga aylanib ulgurgan Ibragimovich jarohat olib, uzoq muddatga safdan chiqqach, “Manchester Yunayted” undan osongina voz kechib qo‘ya qoldi. Ha, natija ko‘rsatmaydimi, o‘ynay olmayaptimi, u kim bo‘lishidan qat’iy nazar, jamoadan ketadi — bu Mourinyuning azaliy qoidasi.
Bir tomondan jamoani ayblab bo‘lmaydi, chunki Zlatan bilan tuzilgan shartnoma yakuniga yetdi. Agar shartnoma muddati tugamay turib aloqani uzganida ayblasa bo‘lardi. Lekin oynaning ikkinchi tomoni ham bor, ayni damda “Manchester Yunayted” Yevropa ligasida g‘olib bo‘ldi, mavsumni uchta sovrin bilan yakunladi, keyingi yili Yevropa Chempionlar ligasida o‘ynash huquqini qo‘lga kiritdi. Zlatan esa mavsumda milliy chempionatning o‘zida 17 ta gol kiritdi. Xo‘sh, “qizil iblislar”ning natijalariga ana shu 17 gol ijobiy ta’sir ko‘rsatganligini kim inkor eta olmadi? Demak, Ibraning bunda o‘z hissasi bor. Qolaversa, uning transferi “MYU”ga katta foyda keltirdi. Shundan kelib chiqib, jamoa Ibra bilan shartnomani yana bir yilga uzaytirsa ham bo‘lardi, sababi, futbolchining o‘zi “Manchester Yunayted”da yana o‘ynashni, keyingi yili bu jamoa bilan Yevropa Chempionlar ligasida qatnashishni, qaysidir ma’noda o‘z mehnatining samarasini ko‘rishni niyat qilgandi. Biroq Joze undan osongina voz kechib qo‘ya qoldi. Sabab bitta, Ibragimovich hozir rezultat beradigan holatda emas, Jozega esa bugun muhim, kelajakning ahamiyati yo‘q.
Endi ikkinchi masalaga o‘tsak, Ibragimovich qaysi jamoada o‘ynashi mumkin?
