Portugaliyaning Sic telekanali jurnalisti Nunu Lush «Real» muxlislarini ranjitadigan yangilikni ma’lum qildi.

Krishtianu Ronaldu bilan yaqindan tanish bo‘lgan jurnalist, 32 yoshli futbolchining jamoani tark etish niyati jiddiy ekanini aytdi.

«Krishtianu Ronaldu Ispaniyani tark etmoqchi. U soliqlarni to‘lashdan bo‘yin tovlaganlikda ayblanmoqda. Ronaldu buni o‘z obro‘siga katta ziyon yetkazdi va klub uni yetarli darajada himoya qilmayapti deb hisoblamoqda. U o‘zining aybsiz ekanini aytgan bo‘lsa-da, hech kim uning yonini olmayotganidan xafa.

Krishtianu bu gaplarni ochiq aytolmaydi, biroq «Real» uni himoyasiz qoldirayotganiga ishonchi komil. Chunki futbolchilar bilan bog‘liq shunga o‘xshash vaziyatlarda klub boshqacha ish tutgan.

Menimcha, «Real» futbolchi atrofidagi voqealar yuzasidan rasmiy bayonot berishi kerak. Krishtianuga Ispaniya yoqadi, u Madridni yaxshi ko‘radi. Sevimli qizi ham ispaniyalik. Biroq u o‘zini himoyalangandek his qilmayapti va bundan g‘azabda» - dedi Lush Marca xabarida.