«PSJ» «Real» hujumchisi Krishtianu Ronaldu uchun kurashda «Manchester Yunayted», «Monako» va Xitoy klublari bilan raqobat qilmoqda.

Corriere dello Sport nashri ma’lumotiga ko‘ra, parijliklar jamoasi 32 yoshli portugaliyalik hujumchi uchun Madrid klubiga 140 million yevro to‘lashni ko‘zlamoqda, shu bilan birga futbolchining o‘ziga yiliga 30 million yevro miqdoridagi maosh va’da qilingan.

«PSJ» prezidenti Nosir Al-Xalayfi futbolchining agenti Jorje Mendesh bilan muloqot qilib, o‘z istagi haqida ma’lum qilgan.

Daily Mail nashri Al-Xalayfi va Mendesh avvalroq, 3 iyun kuni Kardiffda, Chempionlar ligasi finali vaqtida uchrashgani haqida yozmoqda.

Bundan oldinroq «Real» Ronalduni 400 million yevrodan kamiga sotmasligi haqida xabar tarqalgandi.

Italiyadagi La Gazzetta dello Sport nashri ham futbolchining transfer qiymatini 400 million yevroga baholagandi.

Angliyadagi The Telegraph nashri esa  «Manchester Yunayted»ga kelishi kutilayotgan portugaliyalik futbolchiga 150 million yevrolik «narx qo‘ygandi».