O‘zbekiston milliy terma jamoasi JCH–2018 saralash bosqichining Xitoy va Janubiy Koreyaga qarshi o‘yinlarga tayyorgarlik ko‘rish maqsadida shu yilning 17–23 iyul kunlari Turkiyaning Istanbul shahri yaqinidagi Kojaeli muzofotining Izmit shaharchasida o‘quv-mashg‘ulotlar yig‘inini o‘tkazadi.
Bu haqda O‘FF rasmiy sayti xabar bermoqda.
Bosh murabbiy Samvel Babayan mazkur o‘quv-mashg‘ulotlar yig‘iniga 20 nafar futbolchini jalb qildi. Yig‘in FIFA kunlarida o‘tkazilmayotgani tufayli legioner futbolchilar taklif qilinmadi.
Bular orasida “Nasaf” jamoasining uch nafar futbolchisi ham bor, himoyachilarimiz - Akmal Shorahmedov va Farruh Sayfiyev hamda yarim himoyachimiz - Bahrom Abdurahimovlardir.
Akmal Shorahmedov va Farrux Sayfiyevlar bundan avval ham milliy terma jamoamiz safiga taklif etilganidan xabaringiz bor, Bahrom Abdurahimov esa milliy terma jamoaga ilk marta jalb etilmoqda. Ushbu futbolchimiz jamoamiz safidagi ko‘rsatayotgan mazmunli o‘yinlari orqali terma jamoamiz murabbiylarining nihoyat e’tiborini qozondi.
Xabaringiz bor, Ravshan Haydarov boshchiligidagi U-22 terma jamoamiz Xitoyda bo‘lib o‘tadigan U-23 yoshlar terma jamoalari o‘rtasidagi Osiyo Chempionati saralash bahslarida ishtirok etish uchun Birlashgan Arab Aamirligida bo‘lib turishibdi. Ushbu terma jamoamiz safida ham olti nafar futbolchilarimiz Doniyor Narzullayev, Sharof Muhitdinov, Bobir Abduxoliqov, Umidjon Ergashev, Azizjon G‘aniyev va Odiljon Hamrobekovlar bor.
Bu futbolchilarimiz 17 iyul kuni “Navbahor” jamoasi bilan bo‘ladigan nazorat uchrashuvida maydonga tushishmaydi.
Milliy terma jamoamiz a’zolari ham shu kuni erta tongda Turkiyaga jo‘nab ketishadi.
Ma’lumot uchun, O‘zbekiston milliy terma jamoasi JCH–2018 turniri saralash bosqichi 9-turini 31 avgust kuni safarda Xitoy termasiga qarshi o‘tkazsa, 5 sentyabr kuni Toshkentda Janubiy Koreyaga qarshi bahs olib boradi. Ayni paytda O‘zbekiston 8 ta o‘yindan keyin 12 ochko to‘plab, to‘g‘ridan-to‘g‘ri qo‘lga kiritilishi mumkin bo‘lgan yagona yo‘llanma uchun kurashda 2-o‘rindagi Koreyadan 1 ochkoga ortda qolmoqda.
