«Barselona» bosh murabbiyi Ernesto Valverde hujumchi Neymarning «PSJ»ga o‘tib ketishi mumkinligi haqidagi xabarlarga o‘z munosabatini bildirib o‘tdi.

«Mish-mishlar avjiga chiqadigan payt keldi. Buni tushunamiz. Neymar biz bilan, uning o‘yini va xulqi bizga yoqadi. Men u bilan futbolchining kelajagi borasida gaplashmadim. Biz faqat taktika bilan bog‘liq masalalarni muhokama qildik. Biz uning xizmatlaridan foydalanishni rejalashtiryapmiz.

Men o‘z vazifamni bajaryapman, ammo aniqlab olishim kerak bo‘lgan ayrim jihatlar bor. «Yuventus»ga qarshi o‘yin norasmiy bo‘ladi, ammo men jamoaning kurashishini kutyapman. Kundan kunga o‘yinchilar haqida ko‘proq narsa bilib olaman.

Mavsumoldi tayyorgarlik bosqichi doirasida birinchi o‘yin bizni kutib turibdi. Tushunarliki, biz hali tezlik olmadik. Men barcha futbolchilarga o‘ynash imkoniyatini beraman.

Dibala? Bizga yaxshi o‘yinchilar yoqadi, ammo men ko‘proq o‘z futbolchilarimni yaxshi ko‘raman. Kimnidir xarid qilishdan avval u jamoa tarkibini kuchaytira olishiga ishonching komil bo‘lishi kerak», — dedi Valverde.