Faoliyatining asosiy qismini Ukrainada o‘tkazgan o‘zbekistonlik futbolchi Maksim Shaskix chempionatning eng yaxshi to‘purari bo‘lib kelayotgandi.

iSport nashrining Ukraina Premyer-ligasiga asoslanib xabar berishicha, Maksim yaqqol peshqadamlik mavqesidan tushirilgan.

1999 yil Shaskix “Dinamo”ning “Prikarpatye” klubiga qarshi o‘yinida gol urishga muvaffaq bo‘lgan. Bellashuv kiyevlik futbolchilarning 6:0 hisobidagi g‘alabasi bilan yakuniga yetgan. Oradan 18 yil o‘tib, Shaskix nomiga yozilgan gol aslida avtogol ekani oydinlashdi. Videotakrorlarga murojaat qilgan Ukraina Premyer-ligasi endilikda Maksimning gollari soni 124 emas, 123tani tashkil qilayotgani haqida e’lon qildi.

Ma’lumki, ukrainalik Sergey Rebrov ham chempionatda 123ta gol urishga muvaffaq bo‘lgan. Yangi qarordan keyin “Shaxtyor”, “Dinamo” kabi klublar sharafini himoya qilgan Rebrov peshqadamlikda Shaskix bilan qo‘shhokimlikni yuzaga keltirgan.

Ayni vaqtda Sergey Rebrov Saudiyaning “Al-Ahli” klubi bosh murabbiyi sifatida faoliyat olib bormoqda. Maksim Shaskix esa Kiyevning “Dinamo” klubi yoshlariga murabbiylik qiladi.

Eslatib o‘tamiz, Maksim Shaskix 31ta gol bilan O‘zbekiston terma jamoasining ham to‘purari hisoblanadi.