Aytgancha, nimaga hech kim O‘zbekiston terma… e, tfu, Babayan milliy terma jamoasi haqida yozmayapti?

Uyg‘oninglar, hurmatli jurnalistlar. G‘ofillikning payti emas. Har kim ham Saudiyaning to‘rtinchi jamoasi ustidan g‘alaba qozonavermaydi. Nega jimsiz?

Keyin, yagona gol muallifi kimligidan xabaringiz bormi? Sergeev! Bunaqasi endi xuddi haligi oy tutilishi yuz yilda bir sodir bo‘ladiganday gap, men sizga aytsam! Gazetalarni «bejab», televizorlarni «yorib», intervyularni qalashtirib tashlamaysizmi-ey…

Mana hozir Babayandan intervyu olishning ayni payti. Qo‘rqmang, sizni ko‘rib, Axror bobo aytganday, qochib ketmaydi. Axir «Al-Taavon»dek nomi dunyoga mashhur klubni salkam yer tishlatdi. Bu bilan terma jamoamizning xalqaro imijini yana yuksaklarga ko‘tardi. O‘zi bo‘ladimi! Intervyu olish qo‘lingizdan kelmasa, jilla qursa kichik «tashakkurnoma» e’lon qilib qo‘ying-da…

A, «Zob-Ahan»ga yutqazdi-ku, deysizmi? Tushunmadim, nima siz Marsda yuribsizmi? «Zob-Ahan» kimligini, ya’ni, qaysi mamlakat jamoasi ekanligini bilmaysizmi? Osiyo qit’asidan jahon chempionatiga birinchi bo‘lib chiqqan davlatniki-ya! Bunday darajadagi klublar bilan o‘yin o‘tkazishning o‘zi katta «sharaf», men sizga aytsam. Kichik hisobdagi mag‘lubiyat-ku, umuman — g‘alabaga teng!

Menimcha, Lobanov ham golni atayin qo‘yib yuborgan. Nega deganingiz nimasi, mabodo durang natija qayd etilsa, hamma bizga yana boshqacha, «jiddiyroq» ko‘z bilan qaray boshlagan bo‘lardi. Bu esa Babayanning «vertikal-gorizontal» taktikasiga zid. Bo‘yinning davomini ozgina ishlatingda…

Uzr, xotiramdan faromush bo‘ldi, terma jamoa hali ham Turkiyadami? Agar shunday bo‘lsa, hurmatli jurnalistlar, «aybingizni yuvish» uchun juda yaxshi imkoniyatingiz bor! Jamoani qizg‘in dabdaba va jo‘shqin kayfiyat bilan kutib olish.

Ha, aytgancha, Lobanovning «ayyorona» rejasi va Sergeevning «afsonaviy» golini ulug‘lashga qaratilgan plakat-mlakat tayyorlatish esingizdan chiqmasin!

O‘tkir Qalamtebratar