Yoshlar o‘rtasida futbol orqali sog‘lom turmush tarzini oshirish maqsadida O‘zbekiston Yoshlar Ittifoqi Uchtepa tumani Kengashi tumandagi 32 ta maktab o‘quvchilari o‘rtasida mini futbol bo‘yicha liga o‘yinlarini tashkil etmoqda.

Ushbu liga centyabr-mart oylari davomida o‘tkazilishi rejalashtirilgan. Liga Nizomiga ko‘ra centyabr oyida barcha kerakli hujjatlar, jamoalar va jamoa a’zolari ro‘yxati shakllantirilib, jamoa a’zolariga o‘yin qoidalari va liga tartibi bo‘yicha tashkilotchilar tomonidan o‘quv mashg‘ulotlari va qur’a tashlash marosimi o‘tkaziladi. Qur’ada raqib tushgan jamoalar o‘zaro o‘yinlardan so‘ng Oliy va quyi ligalarga saralanadi.

Hamkor tashkilotlar yordamida oktyabr oyidan Oliy va quyi liga tur o‘yinlariga start beriladi. Tur o‘yinlari haftada bir marotaba o‘tkazilib mart oyiga qadar davom etadi. Navro‘z bayrami arafasida musobaqa g‘oliblari aniqlanadi va tashkilotchilar tomonidan maxsus kubok hamda qimmatbaho sovg‘alar bilan taqdirlanadi.

Liga davomida qishqi tur o‘yinlarida dunyo futbolida yetakchi liga hisoblanmish APLda mavjud “Boxing day” tizimi orqali davomiy tur o‘yinlari bo‘lib o‘tadi. Jamoa murabbiylari musobaqa avvalida ro‘yxatga kiritgan futbolchilar bilan almashuvsiz tur o‘yinlarini o‘tkazadi. Ular faqatgina davralar oralig‘ida yangi o‘yinchilarni tarkibga jalb qilishlari mumkin.

Har bir tur yakunida “Eng yaxshi o‘yinchi”, “Eng yaxshi darvozabon” va “Eng namunali jamoa” kabi nominasiyalar orqali o‘yinchilar va jamoalarni taqdirlab borish ko‘zda tutilgan. Liga yakunida Quyi ligada yuqori 3 ta o‘rinni qo‘lga kiritgan jamoalar keyingi mavsumdan Oliy ligada so‘nggi 3 ta o‘rinni qo‘lga kiritgan jamoalar bilan o‘rin almashadi.

O‘zbekiston Yoshlar Ittifoqi Uchtepa tuman Kengashi tomonidan Respublikamiz bo‘yicha birinchi marotaba o‘tkaziladigan ushbu mini futbol ligasi jarayonlari ijtimoiy tarmoqlarda va yurtimizda sportga ixtisoslashgan OAV tomonidan yoritib boriladi.

O‘zbekiston Yoshlar Ittifoqi
Uchtepa tuman Kengashi matbuot xizmati